next up previous
Next: 16 Up: Å cmince Previous: 14

15

1 Après totes ces furdinnes la, vola k' Abram ôt l' bon Diè ki lyi dvize dins ene vuzion. «N' åyoz nén sogne, Abram», dit-st i, «c' est mi, vosse mambor, li ci ki vs mete a houte. Vos åroz ene rescompinse nouzome!»

2 Mins l' Abram respond: «Signeur, cwè çki vos m' pôrîz dner? Dj' eva sins nol efant. C' est l' Eliezer di Damas k' årè tos mes béns.

3 Vos n' m' avoz pont dné d' efant», dit-st i Abram, «et c' est on vårlet di m' måjhon ki dvreut esse mi eritî.»

4 Adon, l' bon Diè lyi cåze insi: «Ci n' est nén lu k' eritrè d' vos, mins l' ci ki mousrè foû d' vosse schô.»

5 I l' amoenne a l' ouxh: «Loukîz l' cir», dit-st i, «et s' contez les stoeles, si vs sårîz.» Adon: «Vos efants, gn årè ostant k' çoula», dit-st i.

6 Abram out fiyåte å Signeur, et c' est ça ki l' Signeur el riwaita come on djusse.

7 I lyi derit co: «C' est mi, l' Signeur, ki vs a fwait moussî foû d' Our, e payis des Caldeyins, po vs diner ç' payis ci, por lu esse da vosse.»

8 «Signeur bon Diè», responda-t i, «kimint çki dj' sårè ki ci serè da minne?»

9 I lyi derit: «Purdoz ene åmaye di troes ans por mi, ene gade di troes ans, on bara d' troes ans, ene tûtrale et on djonne di colon.»

10 Abram lyi trova totes ces biesses la; i les côpa e deus å mitan, et mete les bokets a l' adroet d' onk l' ôte. Mins i n' côpa nén les oujheas.

11 Les moxhets aplovît so les cadåves, mins Abram les tchessive evoye.

12 A l' anuti, Abram sinta ki s' edoirmeut. I fout ewaeré di s' ritrover e li spexheur.

13 Li Signeur derit a Abram: «Vos dvoz saveur ki vos efants dmeurront dins on payis ki n' serè nén da zels. I seront des sclåves, eyet spotchîs cwate cints ans å long.

14 Mins dji pûnixhrè l' nåcion ki les frè sclåves. Adon, il è rexhront tcherdjîs d' tot plin des ritchesses.

15 Tant k' a vos, c' est tot påjhirmint k' vos iroz rtrover vos tåyes: vos seroz essevli après aveur sitî binåjhe tins d' vosse viyesse.

16 C' est al cwatrinme coûsse ki vos efants rvénront avår ci ca, pol djoû d' ouy, les toirts des Amorites ni sont nén co å pus foirt.»

17 Li solea s' coûtcha et, tot d' on côp, dins li spexheur, on vôtion d' foumire eyet ene toitche di feu passît inte les biesses côpêyes a deus.

18 Ci djoû la, l' bon Diè fjha ene aloyance avou l' Abram: «C' est a vos efants k' dji dene ci payis ci, des aiwes di l' Edjipe djusk' åzès grandès aiwes d' Ufrate:

19 li payis des Kenites, des Kenizites, des Cadmonites,

20 des Hitites, des Périzites, des Refayites,

21 des Amorites, des Cananeyins, des Guirgachites eyet des Djezubites.»


next up previous
Next: 16 Up: Å cmince Previous: 14
Lorint Hendschel 2003-07-03
Pablo Saratxaga 2012-05-12