next up previous
Next: 8 Up: Å cmince Previous: 6

7

1 Li Signeur derit a Noyé: «Moussîz e batea, vos et tote vosse måjhonêye: avå totes les djins d' vosse tins, gn a k' vos ki rote droet.

2 Dins totes les biesses bounes a mindjî, vos pudroz setès copes, on måle avou s' frumele; et d' totes les biesses ki n' sont nén bounes a mindjî, vos pudroz ene cope, on måle avou s' frumele.

3 Des oujheas do cir, vos è pudroz setès copes eto, måle et frumele, po leu raece continouwer avå tote li stindêye del daegn.

4 Ca did ci set djoûs, dji m' va fé ploure sol daegn cwarante djoûs et cwarante nutes e rote; avå tote li stindêye del daegn, dji disfaçrè tot les vicants k' dj' a fwait».

5 Et l' Noyé schoûta l' Signeur et fé tot çou k' il aveut dit.

6 Il esteut shijh cints ans vî cwand les aiwes ont cmincî a toumer sol daegn.

7 Adon, cwand les aiwes passît les erives, Noyé gripa dins l' batea. Avou lu, gn aveut ses valets, si feme et les feme da ses valets.

8 Des biesses bounes a mindjî et des cenes ki nel sont nén, des oujheas et d' tot çou ki bodje sol tere,

9 ene cope, on måle et ene frumele, moussa dins l' batea avou l' Noyé.

10 Å dbout d' set djoûs, les grossès aiwes rascovrént l' daegn tote etire.

11 L' anêye ki Noyé esteut shijh cints ans vî, li deujhinme moes, li dijh setinme djoû do moes, ci djoû la, totes les aiwes do grand abîme waclît foû et totes les bates do cir si tapît å lådje

12 pol plouve tchaire sol daegn cwarante djoûs et cwarante nutes å long.

13 Li minme djoû, Noyé aveut moussî dins l' batea avou ses valets Sem, Xham et Djafet et avou zels, li feme da Noyé et les troes feme da ses valets.

14 Et avou zels, gn aveut totes les sôres di grosses et di ptitès biesses ki bodjèt sol tere, totes les sôres d' oujheas, tot çou ki vole, tot çou k' a des penas.

15 Djo, tot çou k' i gn a d' vicant vénve avou Noyé dins l' batea, ene cope après l' ôte.

16 I gn aveut on måle et ene frumele di tot çou ki vike come biesse, et i moussît tertos come li bon Diè aveut dit a Noyé. C' est l' Signeur lu-minme ki cloya l' ouxh pa drî lu.

17 I plova a rlaye sol daegn cwarante djoûs å long. Les aiwes crexhît. Li batea fout solevé å dzeu del daegn.

18 Des teribès grossès aiwes, ki c' esteut! Et l' batea end aléve dissu les aiwes.

19 Les aiwes montént sins låtchî, tantia k' ele rascovrît les pus hôtès cresses k' i gn a dzo li stoelî.

20 Gn aveut d' abôrd ût metes d' aiwe po dzeu l' copete des pus hôtès cresses.

21 Totes les biesses del daegn estént moites: les oujheas, les ptitès biesses, les såvadjès biesses, les biesses ki ridèt sol daegn, et co tos les djins.

22 Tot çou k' aveut l' shofla del veye sol daegn perixha.

23 C' est insi ki li Signeur distrujha tos les vicants k' estént sol daegn: les djins, li bisteu, les såvadjès biesses et minme les oujheas do cir. I fourît disfacés. I n' dimoréve pus ki l' Noyé et les cis k' estént avou lu dins s' batea.

24 Les grossès aiwes durît cint céncwante djoûs sol daegn.


next up previous
Next: 8 Up: Å cmince Previous: 6
Lorint Hendschel 2003-07-03
Pablo Saratxaga 2012-05-12