1 Ça fwait k' l' Abram, ene feye foû di l' Edjipe, monta après l' Néguev, lu, si feme et tot çou k' il aveut da sinne. Et Lot esteut avou lu.
2 Abram esteut foû ritche di bisteu, d' årdjint et d' ôr.
3 Il rôla d' on campmint a l' ôte, do Néguev a Bétel et djusk' al plaece k' il î aveut monté s' toetea po cmincî, inte Bétel et Ay.
4 Al plaece k' il aveut basti èn åté, i gn aveut on boket, i breya l' no do Signeur.
5 Tant k' a Lot, k' esteut avou Abram, il aveut lu eto des ptites et des grossès biesses, et co des toeteas.
6 Li payis n' esteut nén crås assez po dner tot çou k' il avént mezåjhe zels deus eshonne, ca il avént ambedeus on trop gros tcheté po saveur viker eshonne.
7 Et vola k' i gn out minme margaye inte les bierdjîs da Abram et les cis da Lot. Adon, les Cananeyins et les Périzites dimorént dins l' payis.
8 Ça fwait k' Abram arinna l' Lot: «I n' fåreut nén k' i gn åreut del bisbrouye inte mi et vos», dit-st i, «inte mes bierdjîs et les vosses; nos estans des frés.
9 Wai: n' avoz nén tot l' payis dvant vos? Boutez å lådje erî d' mi. Si vs alez après bijhe, dj' end irè après solea; si vos purdoz après solea, dj' end irè après bijhe.»
10 Lot riwaita dvant lu: gn aveut tot l' payis do Djordin, raiwé tot etir. Divant ki l' Signeur ni distrujhaxhe Sodome et Gomôre, c' esteut, djusk' a Sowår, come li djårdén do Signeur, come li payis d' Edjipe.
11 Lot tchoezixha por lu tote li stårêye do Djordin et il end ala après l' levant. C' est insi k' i boutît å lådje erî d' n-on l' ôte:
12 l' Abram dimora e payis d' Canaan, sol tins ki l' Lot end aléve dins les veyes del sitårêye et camper dlé l' veye di Gomôre.
13 Les djins did la, c' esteut tos bandiyes, ki petchént k' araedje conte li Signeur.
14 Ene feye Lot evoye, li Signeur arinna Abram: «Levez vos ouys», derit i, «et del plaece la k' vos estoz, riwaitîz do costé d' bijhe, do solea, do levant et do coûtchant.
15 Oyi, ça: tot l' payis k' vos voeyoz, dji vs el dene, a vos, et a vos efants, djusk' a todi.
16 Dji frè k' vos efants soeyexhe come li poûssire del daegn, tantia k' s' on såreut conter l' poûssire del daegn, on contreut bén vos efants eto.
17 Abeye! Rotez tot avå l' payis, lådje et lon, ca dji vs el dene».
18 Abram, avou ses toeteas, vénve po dmorer dlé les tchinnes di Mambrê, a Hébron; vaila, i bastixha èn åté pol Signeur.