1 Li Signeur derit a l' Abram: «Cwitez vosse payis, vosse famile et l' måjhon da vosse pa po nd aler e payis k' dji vs mosterrè.
2 Dji frè d' vos ene grande nåcion et dji vs benixhrè. Dji frè k' vosse no soeye grand. Vos-minme, vos seroz on benixhmint.
3 Dji benixhrè les cis ki vs benixhront; les cis ki vs rabaxhront, djelzès mådirè; par vos, tos les peupes del daegn seront rbenis.»
4 Abram end ala come li Signeur aveut dit, et Lot pårta avou lu. L' Abram aveut septante cénk ans cwand i cwita Xharan.
5 I purda s' feme Saray, si neveu Lot, tot s' tcheté et totes les djins et les biesses k' il etertineut a Xharan. Il end alît pol payis d' Canaan. Et vo les la arivés.
6 Adon, Abram triviesse tot l' payis djusk' a ene plaece lomêye Sichem, djusk' å tchinne di Morê. Di ces trevéns la, les Cananeyins estént dins l' payis.
7 Li Signeur si mostra a Abram: «C' est a vos efants ki dji dinrè ç' payis ci», dit-st i. Vaila, Abram bastixha èn åté pol Signeur ki s' aveut mostré a lu.
8 Did la, il ala djusk' al cresse k' est å levant d' Bétel. I monta s' toetea etur Bétel å levant et Ay å coûtchant; vaila i bastixha èn åté pol Signeur et braire si no.
9 Et d' on campmint a l' ôte, Abram baga djusk' e Néguev.
10 Adon, ci fout l' pômagne avå l' payis, et Abram dischinda djusk' e l' Edjipe po-z î sodjorner, ca l' famene ravadjive li payis.
11 Et vola k' å moumint do moussî e l' Edjipe, il arinne si feme: «Schoûtez bén», dit-st i, «dji sai bén k' vos estoz ene feme bele a vey.
12 Do côp, cwand les Djupsyins vos vieront et dire: ``C' est s' feme', i m' touwront et vos leyî e vike.
13 Dijhoz lzî, si vos vloz bén, ki vs estoz m' sour; insi, on m' riçurè a môde di djin p' l' amoû d' vos et dji dmeurrè e vike gråce a vos.»
14 Et come d' efet, cwand c' est k' Abram moussa e l' Edjipe, les djins voeyît ki l' feme esteut foirt bele.
15 Des mwaisses sôdårds da Farawon l' avizît et i l' alît rclamer. Ça fwait ki l' kimere fout emoennêye dins l' måjhon da Farawon.
16 C' est leye les cåzes k' Abram esta bén rçuvou, et k' on lyi ofrixha des ptites et des grossès biesses, des bådets, des sclåves, des meskenes, des ågnesses et des chamos.
17 Mins l' Signeur fijha toumer des felès rascråwes dissu Farawon come dissu s' måjhon, et c' esteut Saray les cåzes, li feme da Abram.
18 Li Farawon fjha vni Abram: «K' est çki vos m' avoz la fwait?» dit-st i. «Douvént n' m' avoz nén dit k' c' esteut vosse feme?
19 Douvént m' avoz dit: ``C' est m' sour?'' Djel a pris por leye divni m' feme! Asteure, vo l' la, t' feme! Riprind l' et va-z è!»
20 Farawon cmanda a ses djins del revoyî, lu, si feme, et tot çou k' esteut da sinne.