next up previous
Next: 17 Up: Å cmince Previous: 15

16

1 Saray, li feme da Abram, ni lyi aveut co pont dné d' efant. Elle aveut ene meskene, ene Djupsyinne, ene lomêye Hagår.

2 Et l' Saray derit a Abram: «Li Signeur n' a nén volou k' dj' åye èn efant. Alez avou m' meskene; motoit k' par leye, dj' årè on valet.» Abram fijha come si feme aveut dit.

3 Ça fwait ki l' Saray purda Hagår, si meskene djupsyinne, pol diner come feme a Abram, si ome. A ç' moumint la, i gn aveut dijh ans k' Abram dimoréve e payis d' Canaan.

4 L' Abram coûtcha avou Hagår et cisse chal ratinda famile. Do côp k' ele s' aviza k' ele ratindeut, ele n' aconta pus s' mwaistresse.

5 Adon, li Saray derit a Abram: «C' est vos les cåzes s' on m' dismeprijhe. C' est mi k' a bouté m' meskene dins vos bresses et d' abôrd k' elle a ratindou famile, dj' a conté po rén a ses ouys. Ki l' Signeur djudje etur vos et mi.»

6 L' Abram responda a Saray: «E bén, vosse meskene, c' est da vos. Fijhoz a vosse môde avou leye.» Saray l' a si bén boureaté ki l' ôte a peté å diale lon erî d' leye.

7 L' andje då Signeur el trova dlé on sourdant, e dezert, sol voye di Chour.

8 I l' atôtcha: «Hagår», dit-st i, «meskene da Saray, d' eyu çki vos vnoz et wice end alez vs insi?» «Dji cour evoye lon erî d' Saray, mi mwaistresse!» dit-st ele.

9 L' andje då Signeur lyi derit: «Alez rzè amon vosse maitresse et s' schoûtez tot çou k' ele vos dit.»

10 L' andje då Signeur lyi derit co: «Dji frè k' vos åroz télmint des efants k' on n' les sårè conter».

11 L' andje då Signeur lyi derit ossu: «Asteure, vos ratindoz famile et vos åroz on valet k' on l' lomrè Ismayel, ca l' Signeur a bén sintou k' vos estîz dloujheye.

12 I serè come on såvadje ågne, mi ome! Si mwin conte tot l' monde, les mwins da tot l' monde conte lu! I dmeurrè a l' adroet d' tos ses frés.»

13 Hagår loma l' Signeur ki lyi aveut djåzé Atta El Roy2 ca ele s' aveut dit: «Est ç' di bon k' dj' a veyou chal li bon Diè ki m' voet?»

14 C' est ça ki l' pousse vaila fout lomé Laxhay Roy.3 I s' trove inte Cadech et Bered.

15 Hagår out on valet d' Abram; on l' loma Ismayel, li valet k' Hagår lyi aveut dné.

16 L' Abram esteut cwatrè vint shijh ans vî cwand Hagår lyi dna Ismayel.


next up previous
Next: 17 Up: Å cmince Previous: 15
Lorint Hendschel 2003-07-03
Pablo Saratxaga 2012-05-12