next up previous
Next: 39 Up: Å cmince Previous: 37

38

1 Di ces trevints la, li Djuda a cwité ses frés po dischinde amon on lomé Hira, onk d' Adoulam.

2 C' est vaila ki l' Djuda a veyou l' feye da on Cananeyin lomé Chouwa. I l' a maryî et il a coûtchî avou leye.

3 Elle a ratindou famile et mete å monde èn efant k' on-z a lomé Er.

4 Elle a co ratindou famile on côp. Et elle a co atchté on valet k' on-z a lomé Onân.

5 Adon-pwis, elle a co yeu on fi k' elle a lomé Tchéla. Li Djuda esteut a Keziv cwand elle a metou Tchéla å monde.

6 Po Er, li pus vî d' ses fis, il a tchoezi ene lomêye Tamar.

7 Seulmint, Er, li pus vî da Djuda, c' esteut on metchant pol Signeur, ki l' a fwait mori.

8 Ça fwait ki l' Djuda a dit a Onân: «Alez dlé l' feme da vosse fré. Fijhoz avou leye come li près parint d' on moirt doet fé: mariez l' et s' dinez des efants a vosse fré.»

9 Mins Onân sondjive ki ces efants la n' serént nén da sinne; ça fwait k' a tot côp k' i coûtchive avou s' bele-sour, i leyive si smince si piede al tere po n' pont dner d' efant a s' fré.

10 Et çou k' i fjheut a displait å Signeur, ki l' a fwait mori, lu eto.

11 Adon, li Djuda a-st arinné s' bele-feye Tamar: «Vos dmorroz sins vos rmarier el måjhon da vosse pa, tot rawårdant ki m' valet Tchéla åye grandi.» «I n' fåreut nén k' i mourreut come ses fré, çtila!» sondjive-t i dvintrinnmint. Ça fwait k' nosse Tamar a ristî dmorer el måjhon da s' pa.

12 Ene hapêye passa. Li feme da Djuda, k' esteut ene feye da Chouwa, mora. On côp l' Djuda on pô rapåpyî, i monta après Timna avou s' camaeråde Hila, l' Adoulamite, amon les djins ki tondént ses biesses.

13 Et vola çou k' on djha a Tamar: «Schoû, vosse sorodje est ki monte a Simna po fé tonde ses biesses.»

14 Elle oista ses mousmints d' doû po s' covri d' on voele. Adon, disguijheye, ele s' ala ashire a l' intrêye d' Eynayim, sol voye di Timna. Ele veyeut bén, come di djusse, ki l' Tchéla aveut grandi mins k' i n' l' aveut nén spozé.

15 Djuda l' avize, mins i l' prind po ene arote, ca elle aveut covrou s' vizaedje.

16 Vo l' la k' i ratoûne po vni dlé leye: «E!» dit-st i. «Vénss coûtchî avou mi?». I n' aveut nén rmetou s' bele-feye. «Cwè çki vos m' dôroz,» dit-st ele, «por mi coûtchî avou vos?»

17 «Dji t' va fé apoirter on gadot di m' tropea!» dit-st i. «I va,» dit-st ele, «si vos m' dinez åk e gadje djusk' a tant k' dj' a l' gadot.»

18 «Et cwè çki dj' ewadjreu bén?» dit-st i. «Vosse catchet, vosse coirdon et co l' bordon k' vos avoz dins vosse mwin.» dit-st ele. Et lu, i lyi a dné tot ça po-z aler coûtchî avou leye. Et leye, elle a ratindou famile di lu.

19 L' afwaire fwaite, ele s' a rastampé po nd aler. Adon, elle a saetchî s' voele evoye et si rboter avou ses mousmints d' doû.

20 Djuda, lu, a fwait poirter l' gadot pa s' camaeråde d' Adoulam po raveur çou k' il aveut leyî e gadje al kimere. Mins vola ki l' camaeråde nel trove nén;

21 ça fwait k' i dmande cwè ås djins di ç' costé la. «Ewou est ele tournêye, don, l' arote k' esteut sol voye a Enayim?» «I gn a måy pont yeu d' arote vaila.» respondèt i les djins.

22 Do côp, li camaeråde rivént dlé l' Djuda: «Dji n' l' a nén trové», dit-st i. «Et å dzeu do martchî, les djins did la volèt k' i gn a pont d' arote avår la!»

23 «Vo ndè la ene k' a tos les tours!» dit-st i l' Djuda. «Waitans todi di n' nén passer po des biesses, mi ki lyi a fwait poirter on gadot et vos ki n' l' a nén trové!»

24 Troes moes pus tård, ni vola-t i nén k' on vént prévni Djuda ki «s' bele-feye Tamar s' a disrindjî conte des cwårs et k' al copete do martchî, ele ratind famile» «K' on l' tape a l' ouxh!» brait i l' Djuda, «et k' on l' broûle!»

25 Mins å moumint k' on l' tape a l' ouxh, elle fwait poirter ene comission a s' bea-pere: «Dji ratind famile di l' ome ki çouci est da lu. Loukîz on pô ces cayets la. C' est da kî l' catchet, li coirdon et l' bordon?»

26 Li Djuda ricnoxhe ses djonnes: «C' est leye k' a råjhon, et c' est mi k' a toirt», dit-st i, «ca c' est l' vraiy ki dji n' l' a nén maryî a m' valet Tchéla.» Et l' Djuda ni coûtcha pus måy avou leye.

27 Et vola k' å tins k' ele si dveut acoûtchî, elle aveut ene djermale divins s' vinte.

28 Tins d' l' acoûtchmint, gn a onk des deus efants ki stind s' mwin; li saedje dame l' apice et-z ateler on rodje filé åtoû: «Ci chal a moussî foû l' prumî!» dit-st ele.

29 Mins vola k' l' efant rintere si mwin et k' c' est s' fré ki mousse foû! «C' est on fameus schård ki vs avoz la fwait!» dit-st ele li saedje dame. C' est ça k' on l' loma Perès, ki vout dire Schård.

30 Adon, si fré moussa foû po do bon, li ci k' aveut on rodje filé d' atelé après s' mwin. On l' loma Zéra.


next up previous
Next: 39 Up: Å cmince Previous: 37
Lorint Hendschel 2003-07-03
Pablo Saratxaga 2012-05-12