1 Sol tere tote etire, on n' djåzéve k' on seul lingaedje. Tot l' monde eployive les minmes mots.
2 Mins vola k' des djins, arivant do levant, discovrèt ene sitårêye e payis d' Tchineyår; et i decidèt d' î dmorer.
3 Adon, vo les la k' i s' arinnèt onk l' ôte: «Årdant!», k' i djhèt. «Fijhans des brikes et les cure e for!» Les brikes elzî siervît d' pire eyet l' bitume elzî siervît d' moirtî.
4 «Årdant!» k' il evont. «Bastixhans ene veye et ene tour ki s' copete djondrè li stoelî! Insi, nos nos frans ene rilomêye, sogne d' esse sipårdous tt avå l' tere!»
5 Mins la ki l' Signeur adschind po vey ene miete li veye et l' tour ki les efants da Adan sont k' i costrujhèt.
6 «Bén waite!» dit-st i. «Tertos eshonne, i n' fijhèt k' on seul peupe et n' djåzer k' on seul lingaedje. S' i va insi, gn årè bén rade pus rén a les espaitchî do fé tot çou k' i volèt!
7 Abeye, dischindans radmint po formaxhî leu lingaedje! Insi, i n' si compudront pus n-on l' ôte.»
8 Et, did la, li Signeur les csema pa tt avå l' tere, et c' est insi k' il ont låtchî d' costrure leu veye.
9 Et c' est ça ki ç' veye la fout lomêye Babel, paski c' est vaila ki l' Signeur a formaxhî les lingaedjes di tote li tere et k' il a csemé les djins avå tote li stindêye del daegn.
10 Asteure, voci l' lignêye da Sem: Sem esteut cints ans vî cwand il out Arpakchad, deus ans après les grossès aiwes.
11 Après li skepiaedje da Arpakchad, Sem vica co cénk cints anêyes, et il ava des valets et des båsheles.
12 Arpakchad esteut trinte cénk ans vî cwand i out Chela.
13 Après çoula, i vica co cwate cints troes ans, et il ava des valets et des båsheles.
14 Chela esteut trinte ans vî cwand il out Eber.
15 Après Eber, Chela vica co cwate cints troes ans et il ava co des valets et des båsheles.
16 Eber esteut trinte cwatre ans vî cwand il out Peley.
17 Après Peley, Eber vica co cwate cints et trinte anêyes et il ava co des valets et des båsheles.
18 Peley esteut trinte ans vî cwand il out Rewou.
19 Après Rewou, Peley vica deus cints et nouv anêyes et il out des valets et des båsheles.
20 Rewou esteut trinte deus ans vî cwand il out Serong.
21 Après Serong, Rewou vica co deus cints et setès anêyes et il out des valets et des båsheles.
22 Serong esteut trinte ans vî cwand il out Naxhor.
23 Après Naxhor, Serong vica co deus cints anêyes et il ava des valets et des båsheles.
24 Naxhor esteut vint nouv ans vî cwand il out Teraxh.
23 Après Teraxh, Naxhor vica co cint dijh nouv anêyes et il ava des valets et des båsheles.
26 Teraxh esteut septante ans vî cwand il ava Abram, Naxhor et Arân.
27 Voci l' famile da Teraxh: Teraxh out Abram, Naxhor et Haran, k' aléve esse li pere da Lot.
28 Haran dihota dvant s' pa Teraxh, divins l' payis di s' famile, a Our, amon les Caldeyins.
29 Abram et Naxhor si maryît: li feme da Abram, c' esteut ene lomêye Saray; li cene da Naxhor, ene lomêye Milca, feye da Haran, k' aveut-st avou deus båsheles: li Milca eyet l' Yisca.
30 Saray ni saveut pont aveur d' efant.
31 Teraxh end ala d' Our, el Caldêye. Il emoenna Abram, si valet, Lot, si ptit fi, li fi da Haran, et s' bele feye Saray, li feme da s' valet Abram, et i nd alît tertos sol payis d' Canaan. Mins on côp rexhous a Xharan, i dmorît vaila.
32 Teraxh vica deus cints et cénk ans et i mora vaila, a Xharan.