1 Dina, li båshele ki l' Leya aveut yeu avou Djåcob, moussive foû po-z aler rtrover les marayes d' avår la.
2 Sichem, fi da Hamor li Hivite, mwaisse do payis, aviza l' båshele. Sol côp, i l' apiça pol foircî et coûtchî avou leye.
3 I l' veyeut volti, l' Dina, li feye da Djåcob, et di totes ses foices. Il esteut roed bleu amoureus d' leye et i cåza do fond di s' cour.
4 Sichem ala trover s' pa, Hamor, po lyi dire: «Dinez m' ci båshele la por mi l' marier.»
5 Li Djåcob apurda k' il aveut foirci s' feye. Mins come ses valets estént al campagne avou les biesses, i n' motixha d' rén djusk' a tant k' i fuxhexhe rivnous.
6 Hamor, li pa da Sichem, moussa foû po-z aler djåzer avou l' Djåcob.
7 So ç' tins la, les fis da Djåcob estént rivnous dal campagne. Apurdant l' novele, i montît dins ene five; il estént foû d' zels, ca l' Sichem aveut fwait ene laide keure ever Izrayel, tot coûtchant avou l' båshele da Djåcob; ci n' est nén des afwaires a fé.
8 Hamor elzi djha çouci: «Sichem, mi fi, voet voltî vosse feye di totes ses foices. Dinez lyi por lu l' marier. Aloyîz vs a nosse famile på mariaedje: vos nos dinroz vos båsheles et vos pudroz por vos les nosses.
10 Vos dmorroz avou nozôtes, li payis serè å lådje por vos: vos î ploz bén viker a vosse môde, î fé vos afwaires a vosse môde, î atchter a vosse môde.»
11 Adon, Sichem arinna l' pa dal djonne feye et ses frés: «Pôreut vali k' vos m' riwaitrîz come on vayant: dji vs dôreu tot çou k' vos m' dirîz.
12 Fijhoz m' payî l' mariaedje bon-z et tchir, et vs ofri des bistokes a make: dji påyrè tot çou k' vos m' diroz, mins dinez m' li båshele por mi l' marier.»
13 Les fis då Djåcob respondît a Sichem et a Hamor, si pa. Mins i cåzît come i cåzît po waitî do gorler l' ci k' aveut anichté leu sour Dina:
14 «Nos n' plans nén fé come vos djhoz», k' i respondît «et dner nosse sour a onk ki n' est nén discaloté. Ci sereut nos ahonti.
15 Nos n' consintirans k' si vos divnoz parey a nozôtes, si vos fjhoz discaloter tos vos måles.
16 Nos vos dinrans nos båsheles, et nos pudrans por nos les vosses, nos dmorrans avou vos, et nos n' frans pus k' on seul peupe.
17 Mins si vos n' vos voloz nén fé discaloter, nos rpudrans nosse båshele et nos nd irans.»
18 Hamor, tot come si fi Sichem, fout binåjhe delz etinde djåzer insi.
19 Rade, li djonne ome s' aglidje po fé come il avént dit, ca i l' voleut, l' båshele da Djåcob, et il esteut foirt schoûté dins l' måjhon da s' pa.
20 Hamor et s' fi Sichem vinît al poite di leu veye. Et vola çou k' i djhît a leus djins:
21 «Ces djins la sont-st e påye avou nozôtes. I polèt bén dmorer e nosse payis et î fé leus afwaires; ki nosse payis fuxhe grand å lådje por zels. Marians leus båsheles, et s' dinans lzî les nosses.
22 Seulmint, ces djins la n' vôront bén dmorer avou nozôtes et fé on seul peupe avou nozôtes ki si tos nos omes sont discalotés come leu zels.
23 Leu bisteu, leu tcheté et totes leus biesses ni seront nén da nosse, a pus k' nos consintanxhe a fé çoula, por zels esse d' acoird do dmorer avou nozôtes.»
24 Tos les cis ki moussént foû pal poite del veye si leyît adire pa l' Hamor et s' fi Sichem. Adon, tos les omes si fjhît discaloter, tos les cis ki moussént foû pal poite del veye.
25 Mins vola ki l' troezinme djoû, adon k' les omes n' estént nén co rweris, les deus valets da Djåcob, Simeyon et Lévi, frés da Dina, abrokît avou leu braket el veye ki s' pinséve a såvrité et i macsôdît tos les omes.
26 I touwît l' Hamor et s' fi Sichem avou leus brakets. I rpurdît Dina foû del måjhon da Sichem, pu i vorît foû.
27 Adon, les fis da Djåcob achevît les cis ki n' estént k' cwaxhîs. Adon, i branscatît l' veye pask' on-z aveut avili leu sour.
28 I hapît les ptites et les grossès biesses, les ågnes, pa! tot çou k' i gn aveut el veye et dins les campagnes tot åtoû. I scrotît totes leus ritchesses, tos leus efants et leus femes et i piyît tot çou k' i trovît e leus måjhons.
30 Djåcob arinna Simeyon et Lévi: «Vos m' avoz poirté måleur; c' est vos les cåzes ki totes les djins do payis, Cananeyins et Périzites, mi veyet evî. Nos n' estans k' nos waire. I s' vont rashonner sconte di mi po m' abate. Dji serè macsôdé, mi et m' måjhon.»
31 Et zels respondît: «Est çk' i faleut leyî traitî nosse sour come ene arote?»