1 Adon, pa dvant totes les djins di s' måjhon, li Djôzef ni s' sava pus rastini: «Evoye tertos erî d' mi! A l' ouxh!» Et nouk ni dmora avou Djôzef come i djheut a ses frés kî çk' il esteut.
2 Et portant, i tchoûléve si foirt ki tot l' monde oyeut et, do côp, li novele parvina djusk' a dvins l' palå da Farawon.
3 «C' est mi, Djôzef», dit-st i l' Djôzef a ses frés. «Est çki nosse pa vike co?» Les ôtes ni savént rén responde, télmint k' il estént tot petés del vey.
4 A ç' moumint la, li Djôzef derit a ses frés: «Vinoz dlé mi!» I vnît dlé lu. «C' est mi, Djôzef», dit-st i, «vosse fré k' vos avoz vindou e l' Edjipe.
5 Mins asteure, ni seyoz nén disbåtchîs, ni mwais, di m' aveur vindou vaici, ca c' est po schaper vos veyes ki l' bon Diè m' a fwait vni vaici dvant vos.
6 Vola deus ans ki l' famene peuze sol payis. Et gn a co cénkès ôtès anêyes ki s' kicherront sins labouraedje ni awousse.
7 Li bon Diè m' a evoyî dvant vos po vosse raece ni nén mori, po schaper vos veyes et vos dliberer
8 Do côp, ci n' est nén vos ki m' a evoyî droci, c' est l' bon Diè. C' est l' bon Diè ki m' a metou come pere då Farawon, come mwaisse di tote si måjhon, come govierneu di tot l' payis d' Edjipe.
9 Eralez radmint dlé m' pa, et s' dijhoz lyi: ``Vola çou k' vosse fi Djôzef a dit: li bon Diè m' a fwait mwaisse di tote l' Edjipe. Dischindoz dlé mi sins tårdjî.
10 Vos dmorroz e payis d' Gochèn et vos seroz dlé mi, vos, vos efants, vos ptits efants, vosse raculot, vosse bisteu, li gros come li ptit, et tot çou k' vos avoz da vosse.
11 La, dji vs dôrè d' cwè viker a môde di djin, ca l' famene deurrè co cénk anêyes, por vos n' manker di d' rén, vos, vosse famile, et tot çou k' vos avoz da vosse.''
12 Vos voeyoz d' vos ouys, et mi ptit fré Biniamin voet ki c' est bén m' boke ki vos dvize.
13 Racontez a m' pa l' glwere ki dj' a-st e l' Edjipe, sins rén rovyî, et tot çou k' vos avoz veyou. Adon, dispaitchîz vs di fé ridschinde mi pa vaici.»
14 Adon, i rabressa bén foirt si fré Biniamin tot breyant. Biniamin tchoûléve eto tot l' rabressant.
15 Adon, i rabressa tos ses frés sins s' djoker do braire tot les abressant. Après cwè, i djåspinît tertos eshonne.
16 Mins vola k' e palå då Farawon, on-z aprind k' les frés da Djôzef sont-st arivés. Et Farawon, tot come ses mwaisses sôdårs, voet tot ça d' on boun ouy.
17 Ça fwait ki l' Farawon derit çouci å Djôzef: «Dijhoz a vos frés: ``Vos froz insi: Tcherdjîz vos biesses, et eralez è e payis d' Canaan.
18 Purdoz vosse pa et vos familes, et s' rivnoz dlé mi. Dji vs dôrè les meyeusès teres d' Edjipe et vos vos nourixhroz del cråxhe do payis.''
19 Tant k' a vos, dinez lzî cist ôre ci: ``Vos froz come çouci: vos emoennroz foû do payis d' Edjipe des tchårs po vos ptits efants et vos femes. Purdoz vosse pa et s' rivnoz.
20 Ni tapez nén minme ene ouyåde di rgret so çou k' vos lairoz drî vos, ca çou k' i gn a d' meyeu avå tote l' Edjipe serè da vosse.''»
21 Ça fwait k' les efants da Izrayel fijhît come on lzî aveut dit. Li Djôzef elzî dna des tchårs, come Farawon aveut cmandé, et co di l' amagnî po fé l' voye.
22 I baya co ene mousseure di fiesse a tchaeke di ses frés, a pus k' å pus djonne, k' i lyi dna troes cints sikes d' årdjint et co cénk mousseures di fiesse.
23 Ci n' est nén tot: il evoya co a s' pa dijh bådets tcherdjîs des meyeus prodûts d' Edjipe et dijh bådresses poirtant do frumint, do pwin et di l' amagnî pol voyaedje da s' pa.
24 Adon, i derit arvey a ses frés, ki nd alît: «Waitîz a vosse sogne sol voye!» elzî consia-t i co l' Djôzef.
25 Ça fwait, insi, k' i rmontît foû di l' Edjipe po-z eraler amon Djåcob, leu pa, a Canaan.
26 «Nosse pa! Li Djôzef vike co!» lyi anoncît i. «C' est minme lu ki mine tot l' payis d' Edjipe!» Mins l' cour da leu pa n' tocta pus foirt po ça, ca i n' les croeyeut nén.
27 Et mågré tot, ene feye k' il avît repeté l' messaedje da Djôzef, ene feye k' i out veyou les tchårs ki l' Djôzef aveut evoyî pol prinde, l' esprit då Djåcob, leu pa, si renonda.
28 «Åwe!» côpa-t i l' Izrayel. «Djåcob, mi fi, est co e vike! I fåt k' djel våye vey divant do mori!»