1 L' Izrayel end ala avou tot çou k' il aveut da lu. Arivé a Bersabeye, il ofrixha des sacrifices å bon Diè da s' pa, Izayak.
2 Mins vola k' del nute, Izrayel a ene vuzion. Li bon Diè lyi dit: «Djåcob! Djåcob!» «Vo m' ci!» respond-t i l' Djåcob. «Dji so l' bon Diè, li bon Diè da vosse pa.
3 I n' vos fåt nén aveur pawe di dischinde so l' Edjipe ca, låvå, dji frè d' vos ene grande nåcion.
4 Dji serè avou vos po dischinde e l' Edjipe, et c' est mi eto ki vs è frè rmonter, et l' Djôzef serrè vos ouys.»
5 Adon, Djåcob end ala foû d' Bersabeye et les fis d' Izrayel fijhît griper l' Djåcob, leu pa, leus ptits efants et leus feumreyes so les tchårs ki Farawon aveut evoyî po les prinde.
6 Avou zels, il amoennît leus hiedes, et tot l' tcheté k' il avît acwerou e payis d' Canaan, et i vnît so l' Edjipe, li Djåcob et tos ses efants avou lu:
7 ses valets et les valets da ses valets, ses båsheles et les båsheles da ses båsheles: tote li peclêye, i l' amoenna avou lu e l' Edjipe.
8 Vochal les nos des efants da Izrayel ki vnît e l' Edjipe, Djåcob et ses valets. Rouben, li pus vî,
9 eyet les valets da Rouben: Henoc, Pallu, Hesrôn et Carmi.
10 Les valets då Simeyon: Yemuwel, Yamîn, Ohad, Yakîn, Sohår et Chayûl, li valet d' ene båshele di Canaan.
11 Les valets da Levi: Gerchôn, Kehat, Merari.
12 Les valets da Djuda: Êr, Onân, Chéla, Péres eyet Zera (mins Êr et Onân avént morou e payis d' Canaan) et co les valets da Péres: Hesrôn et Hamoul.
13 Les valets da Issachar: Tola, Yuvva, Yachoub eyet Chimrôn.
14 Les valets da Zabulon: Séred, Élôn, Yahléyel.
15 Vola tos les valets ki l' Leya aveut metou å monde di Djåcob e Paddân-Aram, avou s' båshele Dina. Çou ki fwait, tot contant valets et båsheles, trinte troes djins.
16 Les valets da Gad: Sefôn, Haggi, Chouni, Esbôn, Éri, Arodi et Aréli.
17 Les valets da Acher: Yimma, Yichva, Yichvi, Béria et leu sour Séra; les valets da Béria: Héber eyet Malkiel.
18 Vola po les valets da Zilpa, k' aveut stî dnêye på Laban a s' feye Leya; c' est tos les efants k' ele meta å monde di Djåcob, çou ki fwait saze djins.
19 Les valets da Rachel, li feme da Djåcob: Djôzef et Biniamin.
20 E l' Edjipe, Djôzef ava deus valets: Manassé et Efrayim, vinous å monde d' Asnat, li feye da Poti-Féra, priyesse d' On.
21 Les valets da Biniamin: Béla, Béker, Achbel, Jéra, Naamân, Éhi, Roch, Muppim, Huppim eyet Ard.
22 Vola les valets ki l' Rachel meta å monde di Djåcob, çou ki fwait catwaze djins.
23 Les valets da Dan: Houchim.
24 Les valets da Neftali: Yahséyel, Gouni, Yésser eyet Chillem.
25 Vola po les efants da Bilha, ki l' Laban aveut dné a s' båshele Rachel, çou ki fwait set djins.
26 Totes les djins del famile då Djåcob, vinowes å monde di lu, ki vnît e l' Edjipe avou lu, sins compter les femes des valets da Djåcob, ça fjheut swessante chijh djins.
27 E l' Edjipe, li Djôzef aveut-st avu deus valets. Ça fwait ki, des djins del famile da Djåcob ki vnît avou lu e l' Edjipe, i gn aveut septante.
28 Izrayel evoya l' Djuda amon Djôzef por lu l' rescontrer e Gochèn. Et vo les la arivés al tere di Gochèn.
29 Et l' Djôzef fwait ateler s' tchår po vorer vaila, al resconte d' Izrayel, si pa. Do côp k' il arive, i s' tape dins ses bresses et i brait lontins so s' schô.
30 «Asteure,» dit-st i l' Izrayel a Djôzef «dji pou bén mori: dj' a rveyou vosse vizaedje et vos estoz co vicant!»
31 Adon, li Djôzef atôtche si pa et famile da s' pa: «Dji m' va aler adverti Farawon et lyi dire: ``Mes frés eyet l' famile da m' pa, ki dmorént e payis d' Canaan, sont-st arivés po dmorer adlé mi.
32 C' est tos hierdîs, i s' ocupèt des tropeas. Il ont aminé leus ptitès biesses et leus gros bisteu, et tot çou k' il ont da zels.''
33 Eto, cwand c' est k' Farawon vos houcrè et vs dimander: ``K' est çki vos fjhoz d' vosse mestî?'',
34 vos respondroz: ``Vos sierviteurs s' ont todi ocupé des hiedes dispu tot djonnes, come leus vîs parints l' ont fwait.'' Insi, vos pôroz bén dmorer sol tere di Gochèn.» I fåt saveur ki les Djupsyins veyèt evî tos les hierdîs.