next up previous
Next: 48 Up: Å cmince Previous: 46

47

1 Ça fwait ki l' Djôzef vinve trover l' Farawon po lyi dire: «Schoûtez bén: mi pa et mes frés ont-st avnou foû do payis d' Canaan avou leus efants, leus biesses eyet tot çou k' il ont da zels. Et vo les la sol tere di Gochen.»

2 Adon, i purda cénk djins dins ses frés et les aminer pa dvant Farawon.

3 Ci chal elzî dmanda: «Cwè fjhoz vs di vosse mestî?» «Vos sierviteurs sont des bierdjîs», k' i respondît. «Nos estans bierdjîs come nos tåyes l' ont stî.»

4 I djhént å Farawon: «Nos avans vnou po baguer so cisse tere voci ca i gn aveut pupont d' yebes po les bedêyes da vos sierviteurs; li fåmene pezéve sol payis d' Canaan. Asteure, si vos vloz bén, vos sierviteurs dmorront e payis d' Gochen.»

5 «Vos pere et vos frés», derit i Farawon a Djôzef, «sont vnous adlé vos.

6 Wai, voci l' payis d' Edjipe, divant vos. Fijhoz dmorer vosse pere et vos frés el meyeuse des coines do payis. K' il alexhe dimorer sol tere di Gochen. Si vos cnoxhoz des omes capåbes inte di zels, fijhoz d' zels les mwaisses di mes prôpes tropias.

7 Adon, li Djôzef amoenna s' pere, Djåcob, pol prezinter å Farawon. Djåcob benixha l' Farawon

8 et ci chal lyi dmanda: «Kén ådje avoz?»

9 «Vola cint et trinte ans», dit-st i l' Djåcob, «ki dji dmane avå l' daegn. C' est des courts djoûs, tos fayés djoûs, les djoûs des ans di m' vicåreye. Et i n' sont nén si longs, portant, k' les djoûs des ans del vicåreye da mes peres cwand i dmanént avå l' daegn.»

10 Djåcob, adon, benixha Farawon et moussî foû.

11 Come Farawon aveut dit, Djôzef dina ene prôpieté po s' pere eyet po ses frés dvins pus bele coine do payis d' Edjipe por zels dimorer drola, sol tere da Ramsès.

12 Djôzef etertina s' pere, ses frés eyet tote li måjhon da s' pere: i dna do pwin po tos les efants.

13 Mins vola k' do pwin, i gn aveut pupont, tot avå l' payis, ca on tins d' fele påmagne aveut vnou. Li payis d' Edjipe, come li payis d' Canaan, hawéve di fwin.

14 Adon, li Djôzef råvla tos les cwårs k' i gn aveut ezès payis d' Edjipe et d' Canaan tot vindant do grin åzès djins. Les cwårs, Djôzef les amina e palå da Farawon.

15 I gn aveut pus nén ene mastoke ezès payis d' Edjipe eyet d' Canaan. Adon, tos les Djupsyins vnît trover l' Djåcob po lyi dire: «Dinez nos a mindjî. Douvént fåreut i k' nos crevanxhe di fwin pa dvant vos, fåte di çansses?»

16 «E bén d' abôrd», k' i responda, «dinez m' vos tropeas. Si vos estoz discwårlés, dji vs dôrè a mougnî conte vos tropeas.»

17 Ça fwait k' il aminît leus biesses å Djôzef. Et ci chal elzî dnéve a magnî conte des tchvås et des bedots, des boûs et des ågnes. Ciste anêye la, i lzî dna do pwin conte totes leus biesses.

18 Et vola ciste anêye evoye. L' an d' après, i l' vinît co ene feye trover et lyi dire: «Nos n' catchrans nén a nosse mwaisse ki nos liårds sont-st evoye, et k' nos biesses sont da nosse mwaisse, asteure. I n' nos dmeure pus, pa dvant nosse mwaisse, ki nos carcasses eyet nosse tere.

19 Pocwè fåreut i k' nos moranxhe pa dvant vos ouys, et nosse tere avou? Acatez nos, nozôtes-minmes eyet nosse tere, conte do pwin. Nos serans, nozôtes-minmes eyet nosse tere, å siervice di Farawon. Mins dinez nos del sumince! Insi, nos sorvicrans, nos n' mourrans nén eyet l' tere ni serè nén rsouwêye.»

20 Adon, vola l' Djôzef k' atchtêye pol compte da Farawon tote li tere d' Edjipe. Oyi: tos les Djupsyins vindént leus tchamps, télmint ki l' fåmene esteut fele. Et c' est insi k' po fini, li payis apårtineut a Farawon.

21 D' on costé a l' ôte di l' Edjipe, i fjha baguer les djins dins les veyes.

22 Portant, li Djôzef n' acata nén les teres dåzès priyesses, ca li Farawon aveut fwait ene lwè por zels: c' est l' Farawon ki lzî dnéve a magnî et, do côp, i n' divént nén vinde leus teres.

23 Djôzef derit a les djins: «Bè vola, enute, dji vs a-st atchté pol compte di Farawon, vos et vos teres. Vos åroz des sminces et vos såroz sumer dins vos teres.

24 Di vos awousses, vos dôroz on cénkinme a Farawon. Les cwatre ôtes, c' est por vos sumer dins vos tchamps et vos tchevi, vos, vos djins, et vos efants.»

25 «Vos nos avoz schapé», end alént i. «Pôreut vali k' vos nos loucrîz d' on boun ouy, vos, et nos serans les sclåves da Farawon.»

26 Adon, li Djôzef fijha passer li lwè ki våt co ouy: on cénkinme del tere d' Edjipe est po Farawon. I gn a fok les teres dåzès priyesses ki n' sont nén da Farawon.

27 Izrayel dimora e payis d' Edjipe, sol tere di Gochen. Drola, i divnît prôpieteres et il avît des efants, tot plin des efants.

28 Djåcob dimora dijh set ans e l' Edjipe. I vica cint cwarante set ans.

29 Cwand l' moirt da Izrayel aprepa, ci chal criya après s' fi Djôzef et lyi dire: «Si vos m' loukîz come on vayant, metoz vosse mwin dzo m' djambe. Mostrez m' ki vos m' voeyoz voltî et ki vos m' seroz fidéle: ni m' eterez nén e l' Edjipe.

30 Dji m' coûtchrè avou mes tåyes. Poirtez m' foû di l' Edjipe et m' essevli dins leu fosse.» «Dji frè come vos avoz dit», responda-t i l' Djôzef.

31 «Djurez mel!» dit-st i. Et l' Djôzef djura. Izrayel si meta a djnos al tiesse di s' lét.


next up previous
Next: 48 Up: Å cmince Previous: 46
Lorint Hendschel 2003-07-03
Pablo Saratxaga 2012-05-12